Black Friday Chegirmalari – Shoshiling!

BlackFridayda arzon savdo qilish uchun odamlar ne ko’ylarga tushishi ko’rsangiz edi. Bu ne mashmashaligini ko’rish uchun bugun birinchi marta men ham o’sha yerga bordim. Blak Friday Amerikda bayram faslining boshlanishini belgilab beradi, do’kondagi har bir tovarning narxi pasaytiriladi. Bu kunda do’konlar juda erta ochiladi. Odamlar esa do’kon eshiklari ochilishini kutib uzun-uzun qatorga tizilishadi. O’tgan yillarda do’kondagi narsalar uchun talashgan odamlar ham bo’lgan, hatto arzon narxga narsa sotib olaman deb o’lim hollari ham yuz bergan.

Shunchaki...she'r yozish haqida

Hozir o'zim yozgan she'rni o'rtog'imning blogida ko'rib, g'alati bo'lib ketdim. O'sha paytdagi ahvolimni eslab shunaqangi xo'rsingim keldiki....

 Allohga shukr, o'zimni tiklab olgandayman. Yana she'r yozgim kelib ketdi. She'r yozish uchun, she'r yoza olish uchun aslida nima kerak? 

Nega she'r yozmaysiz, degan savollarga hazilomiz "Men she'r yozishni tashlaganman", deyman. Aslida, she'r yozish "tashlab yuborsa" bo'ladigan ishmi?

Nikoh kechasidagi duo

Alloh xohlasa, nikoh arafasida turibman. Shuning uchun ham oxirgi paytlarda o'ylagan o'ylarim, surgan hayolim, o'qigan va eshitgan gaplarim: hammasi nikoh va oila haqida. Bundan bir muddat ilgari Feruza kennayimnikiga borgandim. Ular mendan bir iltimos qildilar: duolarimda ularni ham eslab o'tishni. Bajonidil qabul qildim. Shunda Feruza opa menga bir xabar berdilarki, (kenayim aniq hadisni ayni paytda topa olmadilar, ammo juda ilmli bir ayoldan eshitgnaliklarini yetkazdilar) ikki paytda qilingan duo hech bir to'siqlarsiz qabul bo'lar ekan. Birinchisi, Qadr kechasida qilingan duo.

Salomlashish qoidalaridan

Ma’lumki, Payg’ambarimiz s.a.v. Me’roj kechasi Alloh taolo bilan uchrashadi. Uchrashuvdagi aynan so’zlar namozning ayrim qismlariga aylangan. Namozda qa’daga o’tirgach “Attahiyat” da nima uchun birinchi Alloh taolo Rasuliga salom beradi va Rasululloh s.a.v. ikkinchi bo’lib salom beradi, deb doim o’ylab yurardim. Shuncha paytdan beri qunt qilib shu narsani so’rab surishtirmagan edim. Kecha eski Irfon taqvimlaridan birida juma mav’izasidan salomlashish haqida o’qib qoldim. Unda salom berish qoidalari bir qator yozilgan bo’lib, men tushunmay yurgan masalaga quyidagicha javob berilgan ekan: “Boyligi, mulki ko’p bo’lgan odam avval salom beradi. Me’roj kechasi Payg’ambarimiz alayhi salom Alloh bilan ro’baro’ bo’lganlarida avval Alloh salom bergan”.

"Biz baxtli oila quramiz" dan

Bugun darsdan keyin kutubxonada qolib davlat imtihonlariga tayyorlanmoqchi edim. O'zim bilan uydan Shoira Nuritdinova to'plab nashrga tayyorlagan "Biz baxtli oila quramiz" degan kichkina kitobcha ham olib chiqqan edim, bu kitob zo'rlik qildi. Xullas, imtihonga tayyorlanish ertaga qoldi, xudo xohlasa.

Kitob menga juda ham yoqdi, ayniqsa yosh qizlar (yigitlar) uchun yaxshi turmush o'rtoq, yaxshi kelin (kuyov) bo'lish va umuman Rasululloh s.a.v.ning sunnatlariga ergashuvchi yaxshi banda bo'lish haqidagi gaplari, nasihat va maslahatlari boshqa kitoblardagidan ko'ra ko'proq, soddaroq va yaxshiroq yetkazib berilgandek tuyuldi.

Kitobga qalam bilan belgilab qo'ygan menga yoqgan joylarini shu yerga post qilmoqchiman.

Tamal toshi

Shunday qilib, ancha paytdan beri qilib yurgan ahdu paymonimizni oraga ovoza qilib, 20-mart kuni Fotiha to'yimiz, ya'ni unashtirish to'yimiz bo'lib o'tdi. Qallig'im bu marosimni qurilajak turmushimizning tamal toshi deb atadi. Allohdan qurilajak turmushimizni har ikkimiz uchun, har ikki dunyoimiz uchun xayrli qilishini so'rayman. Meni qatorimdagi qizlarga ham, qallig'im qatoridagi yigitlarga ham shu yo'lni berishini tilayman.

shunchaki o'ylar...

Bugun "O'zbekiston xalqlari siyosiy-huquqiy ta'limotlari tarixi" fanidan leksiyada o'tirgandik. Mavzu Alisher Navoi, Mirzo Ulug'bek va Boburning siyosiy-huquqiy qarashlari haqida ekan. Domla maxsus adabiyotlar ro'yxatini yozdirayotgan edi, 3-Saddi Iskandariy, dedi. Odatda, adabiyot yozilayotganda birinchi muallif ismi, keyin adabiyot yoziladi. Domla nimagadur bu asar muallifini aytmay ketdi. Shunda kursdosh bir qizimiz, muallifini kim, deb qoldi. Butun potok 2-3 minutlar shovqin suron ichida qoldi. Kulgani kim, adashibdida degani kim. Domla ham hayratlanganicha, aniq javobni aytmasdan, u-bu gapni gapirsa, javob berayotgan qiz dovdiragancha shu yoshga kirib, shunday oliy dargohda o'qib turib, Saddi Iskandariyning muallifi kim ekanligini bilmasligini, mayli u ham bir chekkada qolaversin, tartib raqam bilan ketayotgan adabiyotlar ro'yxatidan mavzu nomi bilan ham mantiqan o'ylay olmayotganini hammaga oshkor qildi. Yonimda o'tirgan yana bir qiz "tochna adashib kirib qogan" dedi. Ha, adashish ham shunchalik bo'ladimi. Bir kulgim keldi, bir xijolat chekdim, bir essiz degim keldi. Qaysi biri o'rinli? Hech bo'lmasa, metroni A. Navoi stansiyasida ham Saddi Iskandariy deb yozib qo'yilgan. Bu qiz metrodan yurarmidi o'zi? Adashib kirib qolganlar... unaqasi bizda ko'p. Qanchadan qancha yoshlar esa adashib kira olmay qolishadi, shunisi achinarlida. Juda ko'pchilik adashib kirib qoladi bizning institutga.

Haqiqiy qish....

Toshkentda qalin qor yog'di. Ketma-ket kunlar muz ustiga qor yog'di. Havo juda sovib ketdi. Shunday sovuq kunlarda Farg'onadan mehmon kutdik. Ular Nurotaga ketishdi. Shanba kuni ertalab tursam, havo juda sovuq ekan. Bilaman, hamma joy muzlab qolsa ham O'zbekistonda maktablar yopilmaydi, kel o'zimni bir xursand qilay, deb men institutga bormadim. 13-fevral bo'lgani uchun kennayim yillik hisobotlari bilan juda band edi. Aytishlaricha, 15-fevral yillik hisobot topshirishning oxirgi kuni ekan. Hali statistikaga borish kerak, hali soliqqa, hali buxgalterga, ishqilib ish ko'p paytida ustiga ustak pechat aptekadan qolib ketibdi. Men borib olib keladigan bo'ldim. Ko'chaga chiqsam bekat orqasida bitta kulib turgan narsaga duch keldim. Beixtiyor meni ham yuzimda tabassum yugurdi. Qarang, qanday ajoyib:

Hohohoy! Osilib turgan qoshchalarini buni, sharfchalari ham bor. :)Shartta rasmga tushirib oldim.

Qaytib kelib, shu yerdan o'tayotsam ikkita katta yoshli rus ayol qorboboni yonida rasmga tushishayotgan ekan. Men ham ulardan meni qorbobo bilan birga rasmga olib qo'yishlarini iltimos qildim. Bugun ertalab havo oldingi kunlardan ham sovuqroq edi. Muzda toya-toya institutga bir amallab yetib oldim. Ha, bugun avtobusda ketdim ertalab. Shunaqa tiqiliiiiinch. Yo Alloh, o'zingga shukr, haliyam bizni uyimiz oxirgi bekatda joylashgan. Yoki men institutga umuman borishni yig'ishtirib qo'yarmidim.
Ha, yana bitta rasm: qanchalik muzlaganini ko'rsatish uchun. Bu sumalaklar 4 kundan beri shu ahvolda turgandi. Bugun erib boshlabdi.

Chaqmoq sarlavhalar

Hozir ziyouz kutubxonasida kitoblarni bir-bir ko'zdan kechirayotgan edim. O'zi kitob o'qishga hech vaqtim yo'q. O'qiyman desam o'qishim shart bo'lgan kitoblar qator-qator bo'lib, jovonda navbat kutib turibdi. Ammo ziyouz kutubxonasini ham bir qarab chiqgim keldi. Shunda birdan mana bu kitob e'tiborimni tortdi:

ziyouz kutubxonasi

Sarlavhani jarangdorligini qarang! Endi bu kitobni o'qishni juda juda xohlay boshlayapman. Albatta, bu sarlavha menga notanish emas, bir-ikki eshitganman. Ammo endi uni o'qimasam bo'lmaydigandan tuyulayapti.

Shunda fikr tug'ilayapti: ha, haqiqatdan ham sarlavhada gap ko'p. Esimda, Nafis San'at litseyida o'qib yurgan kezlarimiz bizni ijod qilib biror narsa yozishga majburlashardi, yozib mashq qilardik. Eng qiyin dam esa, unga sarlavha tanlash edi. Ustozimiz "sarlavha asarning yarim ma'nosini aytib berishi kerak", deya bot-bot takrorlashdan hormasdi. Ammo bu juda qiyin ish edi. Ijod degani bu o'ylab qilinadigan narsamas, u kelib qoladi va tashlab ketiladi, derdim men. Men hech qachon sarlavhalarimni ooooo'ylab qo'ymaganman; boshimga chaqmoqday uriladi va bo'ldi, u sarlavhamga aylanadi.

Eng so'nggi semestr boshi...

Mana, bir amallab oliygohdagi o'qishimning eng oxirgi semestriga ham yetib keldim, Yaratganga shukr. 

Bu semestr bizga 9 ta yangi fan o'tilayapti. Hammasi qiziqarli, deyarli barini boshi "sud" so'zi bilan boshlanadi: sud buxgalteriyasi, sud meditsinasi, sud psixiatriyasi, sud statistikasi va boshqalar.

Sessiyadan horib chiqib, yana yozishga tushib ketdik. Yoza-yoz, nazarimda 4 yil, balki besh yildir, yozish bilan o'tib ketdi umrimiz. Ha mayli, yozmasak leksiya zerikarli bo'lib qoladi, chunki qiladigan ish qolmay qoladida. O'zimcha o'ylayman, bu yozishlar ham g'animat, keyin meni majburlab yozdiradigan odam topilmay qoladi. Bir adashib qo'limga ruchka tutib qolsam ham o'zi tovuq panjasi bilan yoziladigan harflarim, Microsoft Officedagi eng xunuk tushunarsiz shrift bilan bellashib qoladi. Har holda MS officeda ma'lum bir qonuniyatlar bo'ladi, menda es YO'Q. Shunisi yaxshida, men hech kimga o'xshamiman :)

“Olloh”, deb…

Agar dengiz chayqalsa, to’lqin qo’zg’alib, bo’ron ko’tarilsa, kemadagilar:”Olloh”, deb munojot qilurlar.

Agar yo’l boshlovchi sahroda adashsa, karvon yo’ldan og’ib, qay tomonga qarab yurishni bilmay, lol-u hayron tursa: “Olloh”, deb nido qilurlar.

Agar boshlariga musibat tushib, balolar yo’gilsa, ofatlar kattalashib, hayot tang kelsa: “Olloh”, deb duo qilurlar.

Agar eshiklar muhtojlarga ochilmasa, talabgorlar oldiga pardalar tushsa: “Ollohim”, deya yolvorurlar.

Agar chora-tadbirlar foyda bermay qolsa, yo’llar toraysa, orzu-umidlar so’nib, ishonch rishtalari uzilsa, yana: “Olloh”, deya munojot qilurlar.

Agar keng yer tor kelsa, olti tomon yopirilib, qalblarni siqsa, faqat: “Olloh”, deya yolborurlar.

Chunki jojatlarni ravo etguchi, tanglikdan kenglikka chiqarguvchi, yo’qni orga aylantirguvchi, yo’qni borga aylantirguvchi, dardlarga malham berguvchi faqat Ollohdir.

U yaxshi so’zni, xolis duoni, chin munojotni beshak qabul etur.

Unga saharlarda ko’zyosh to’kilur, hojat mahallarda qo’llar cho’zilur, sog’inchdan sarg’aygan ko’zlar termulur…Uni eslash bilan qalblar xotirjam bo’lur, rohlar taskin topur, hissiyotlar tinchlanur, asablar bosilur, aql joyiga kelur, ishonch mustahkamlanur.

Yurfak?

Juda ko’pchilik qayerda o’qishimni so’raganida, yuridik institut bilan yurfak, ya’ni yuridik fakultetni chalkashtirib yuboradi. Omma orasida mashhur bo’lgani yurfak, yuridik so’z oliy dargohga nisbatan ishlatildimi, ha yurfakda deb qo’yishadi. Bu hatto ziyoli odamlar o’rtasida ham ko’p uchrab turadi. Masalan, shifokorga qatnaganim haqida ma’lumotnoma olmoqchi bo’lganimda ham o’qish joyiga Yurfak deb yozib berishibdi. Aslida yurfak O’zbekistonda mavjud emas. Yuridik sohada yetakchi oliy dargoh Respublikada yagona Toshkent Davlat Yuridik Instituti (wikipediadan) bo’lib, bundan tashqari O’zbekiston Milliy Universitetining huquqshunoslik fakulteti mavjud; mazkur fakultet ham yuridik fakultet deb emas, balkim huquqshunoslik fakulteti deb yuritiladi. Ushbu istiloh borasida adashadigan odamlar aynan Milliy Universitetning huquqshunoslik fakulteti bilan alohida oliy dargoh Yuridik Institutni chalkashtirishadi. Odamlar orasida, ikkalasi ham bir sohaku, degan o’ylar yurishi mumkin. Hattoki ikkala dargoh ham shu sohani bitiruvchi talabalarga umumiy yurist degan diplom beradi. Ammo biri institut, ikkinchisi esa fakultet maqomida. O’zbekiston Milliy Universiteti tarkibida huquqshunoslik fakulteti universitet tashkil topgandan mavjud edi. Toshkent Davlat Yuridik Instituti esa 1991 yilda alohida institut sifatida universitet tarkibidan ajralib chiqdi. Shundan so’ng 1997 yilda Milliy Universitetda huquqshunos-pedagog fakulteti tashkil etildi va bu 2000 yilda huquqshunoslik fakultetiga aylantirildi. Bundan tashqari ikkala dargohdagi ilmiy muhit ham bir-biridan farq qiladi. 

Nikoh shartnomasi

Ikki haftalar olding Institutimizga Germaniya Oliy sudi sudyalaridan biri tashrif buyurdi. Aslida Senatga tashrif buyurgan sudya xonim rektorimiz taklifiga binoan talabalar bilan suhbat o’tkazdi.

Sudya xonim oila munosabatlari bo’yicha mutaxassis ekan. Germaniya oila huquqi to’g’risidagi tanishtiruv ma’ruzasidan so’ng savol berish navbati talabalarga o’tdi. Rektorimiz chet ellik mehmonlar kelganda xorijiy tillarni biladigan talabalari bilan maqtanishni yaxhsi ko’radi. Tarjimon bo’lishiga qaramay ingliz tilida savol berdik. Oramizda bitta bo’lsa ham nemis tilini biladigan talaba qiz topildi, u nemis tilida savol berdi. Albatta, bundan sudya xonim xursand bo’lgan bo’lsa kerak.

Savollar asosan oilaviy munosabatlardagi ajralishlar haqida edi. Talabarni qiziqtirgan narsalar ko’proq statistik ma’lumotlar bo’ldi. Meni qiziqtirgan savol oila sudlariga sudlarning tayyorlanishi, ularning ta’lim jarayoni edi. Ammo, suhbat davomida o’rtaga tashlangan bir savol e’tiborni jalb qildi: bu nikoh shartnomasi edi. Nikoh shartnomasiga O’zbekistonda kirishayotganganlar foizi qancha ekan? Men hozirgi kungacha biron kishining nikoh shartnomasiga kirishibdi, degan xabarni eshitganim yo’q. Eslayman, ikkinchi kursligimda huquqshunos akam uylangan edi, o’shanda men nahotki siz yurist bo’la turib nikoh shartnomasi tuzmaysiz deganimda, esing joyidami degandi. Xosh, nikoh shartnomasi tuzmaslikning nimasi yomon?

Kutubxona va taraqqiyot

Bugun Alisher Navoiy kutubxonasiga bordim. Ko’proq shug’ullanishim va yozishim kerak bo’lganligi bois, shaxsiy komputerimni ham olib brogan edim. Kiyimlar va buyumlar saqlanadigan xonaga narsalarimni qo’yib, mutolaa xonasiga kirsam, bu yerda komputer bilan ishlash mumkinmasligini aytishdi. Shug’ullanish uchun komputer zarurligini tushuntirganimdan so’ng, mutolaa xonasida elektr tokiga ulashning imkoni yo’qligini, agar elektr tokidan foydalanmoqchi bo’lsam, dissertatsiyalar xonasiga chiqishim kerakligini tushuntirishdi. Rozi bo’lib, dissertatsiya bilan shug’ullanuvchilar xonasiga borsam, u yerda shaxsiy kompyuter bilan kutubxona elektr tokidan foydalanish mutlaqo mumkin emasligini, bu haqda kutubxona ma’muriyatining bir parcha qog'ozga ogohlantirishyozib qo'yganini ko'rdim. Nachora, xatto kutubxona ma’muriyati tomonidan chiqarilgan hujjatda shunday deyilgan ekan, bo’ysunishdan boshqa iloj yo’q. Kutubxonachi xodimlarning baqiriq-chaqiriq, ayrimlarining esa bunday noqulay ahvolga tushib qolganimdan qilgan qayg’urish ko’rinishidagi munosabatlarini chetga qo’ya turaylik va meni o’sha paytidagi omadim yurishmagani tufayli tushib ketgan kayfiyatimni ham unutaylik, ammo ma’rifat, jiddiy va chuqur izlanish maskani bo’lgan kutubxonada o’quv quroli bo’lgan shaxsiy kompyuterdan foydalanishning taqiqlanishini qanday so’z bilan izohlash mumkin?

Kundalik bilan xayrlashuv :D

Meni kundaligim to'lib qolibdi. O'zi bu daftarni boshlaganimga uncha uzoq muddat bo'lmagandi, bilmadim, tez yozib yubordimmi yoki daftarni varaqlari kammikan. Bu daftarimni boshqalaridan farqi, men uni yaxshi ko'rib qoluvdim, balkim ko'rinishi bejirimligi uchun, balkim esa ichida yozilgan narsalari uchun. Bu daftarni bir umr yozishni xohlagandim. Shu paytgacha tutgan barcha daftarlarim to'lishi bilan yoki yirtib yuborganman yoki yirtmasdan ham axlatga tashlab yuborganman. Ba'zilarida sal ikkilangan hollarim bo'lgan, lekin juda ham oz darajada. Eng qizig'i, qaytib hech qachon o'sha kundaliklarimni tashlab yuborganim uchun afsuslanmaganman, aksincha qutilganim yaxshi bo'ldi, yoki ehh eslashga ham arzimaydigan matoh deb hisoblab kelganman. Hozir oxirlab borayotgan daftarimdan ayrilgim kelmayapti. Afsuski, oxirgi sahifani yopishga majburman. Bu daftarni tashlab yubormasligim aniq, qiziq uni endi qayerga bekitsam ekan, chunki odam yaxshi ko'rgan narsasini hammadan qizg'anadi.
Xullas, yangi daftar olish kerak. U daftarni boshlab yozish uchun hafsala kerak. Birato'lasiga O'zbekistonda boshlasammikan? Qiziq, O'zbekistonda ham aynan shunga o'xshash daftar topilarmikan, yoooq topilmasa kerak. O'xshashi bo'lmasa ham, menga hozirgisiga o'xshab yoqib qoladigani?

1. Eng go'zal, eng toza, eng shirin va eng yaxshi payt tongdir.

2. Hozir shundoq turib ana u bir to'da kun chiqar tomonga shoshib ketayotgan oppoq bulutlarga borib, ustida nimalar borligini ko'rib kelsamda. Qachon odamda shunday imkoniyat paydo bo'larkan. Ana u tog'lar ortida nimalar borligini ko'rmoq istasak, borib ko'rib kelish imkoni mavjud, lekin hozirgi xohishim uchun yoki ozgina vaqt o'tishi kerak, yoxud texnologiya tezroq rivojlanishi kerak.

3. Islomiy tasavvurdan boshqa tasavvurlar falsafalarining katta xatosi Xoliq (yaratuvchi) bilan Maxluq (yaratilmish) o'rtasidagi farqlarni tushunmasliklaridadir. (c) Shayx Muhammad Sodiq Muhammad Yusuf

Odam Nega Tush Ko'radi?

Odam nega tush ko'radi?

Buncha ko'p tush ko'raman? Kipriklarim bir biriga yetishdi deguncha, ketma-ket davomli, alamli, qo'rqinchli ba'zida shirin tushlar boshlanadi. Bir uyquga ketganda necha marotabagacha tush ko'rish mumkin?(har doim shuni mutaxassislardan so'rayman deb yuraman) O'rtacha hisobda 5-6 ta desam ko'pchilik ishonmaydi. Aytishlaricha, shuncha tush ko'rsa ham, odam eslab qola olmas ekan. Negadur meni esimda qoladi, qolganda ham shunchaki tasvir bo'libmas, o'sha his-tuyg'ulari bilan qoladi. Shunaqa aniq taassurotlar bilan qoladiki, ba'zida hayotda bo'ldi shu narsa degan hayolga borib qolishimga ham sabab bo'ladi.

Ko'rgan tushlarimni ustidan ba'zida kulib, ba'zida qo'rqib ketib, ba'zida shubhalanib qolib, o'zimga ozim aytaman:balkim har kuni ko'rgan tushlarimni qog'ozga yozib qo'yganimda Ray Bridburyning hikoyalariga o'xshagan kitob qilsa bo'larmidi?

Kutubxonamiz...

Bolaligimda eng yaxshi ko’radigan mashg’ulotim “darsxona”gi kitoblar to’la jovon ustiga chiqib olgancha duch kelgan kitobni o’qib chiqish edi. Kitoblar ko’pligidan qaysi birini birinchi o’qish uchun tanlashni bilmay, ko’zimni yumgan holda duch kelganini tanlardim va balanroq bo’lgan shkafdanning paski qismidan sakrab tushishga ham ulgurmay jovon yonida o’tirgan go’yi o’qishga kirishib ketganimni bilmay qolardim. Hayolimda yillar o’tsa ham bu kitoblarni o’qib bitkiza olmaydigandek tuyulardi. Hech bo’lmasa maktabni tamomlaganimgacha ulgurarmikanman, deb hayratlanardim. Menimcha, dadamning biz farzandlari uchun qilgan eng katta hadyasi shu kutubxonamiz bo’lsa kerak. Men shu kitoblar orqali chekka bir shaharchada yashashimga qaramay butun dunyoni ko’ra olardim. Bizning uyimizdagi kutubxonaning ta’rifi tuman maktablaridagi mashhur o’qituvchilarning ham e’tiboriga tushgan edi. Esimda, 6-sinfligimda “Milliy istiqlol g’oyasi” fanidan ancha yillardan beri adabiyot fanidan dars berib kelayotnga tumanning faxriy o’qituvchilaridan O’roqov ma’lim dars davomida o’quvchilar bilan tanishar ekan, siz Abdullaevamisiz, ehhe bilasizlarmi bolalar, Abdullaevalarning uyida shunaqa bir kutubxonasi borki…..deb ta’riflashga tushib qoluvdilar. Shunda boshqa o’quvchilarning oldida faxrlanib ketgan edim.
Jovonning eng yuqori qatorlarida turadigan 12, 18, 20 tomlik barchasi bir xil kitoblarni o’qib bitkazish haligacham nasib qilgani yo’q. Chunki bu kitoblar rus tilida edi, rus tilidagi yozilgan kitoblarga unchalik ham tishim o’tavermas edi.

Ota-ona nazari bilan

Yaponiyaga bundan oldin kelganimda yapon oilalari bilan 3-4 kun o’tkazish uchun Madaniy Almashinuv dasturini o’tagan edim. Baxtimga juda ham yaxshi oila bilan tanishdim: yoshlari 62 va 60 lar atrofidagi er-xotin va ular bilan birga yashovchi buvilari va 35 yoshlardagi qizlari. Men ular bilan vaqtimni chog’ o’tkazardim: oila boshlig’i Takao (men ularni ota-yani Otousan deb chaqiraman)ning nihoyatda keng dunyoqarashi va komputerlar va texnika olamiga bo’lgan qiziqishi yoqib, soatlab suhbatlashardik. Eng muhimi, ikkalamiz ham uchchiga chiqgan video va rasm borasida qiziquvchan chiqib qoldik. Otousan Takao men bilan ingliz tilida so’zlashishga harakat qiladi, men esa uning shu yoshigacha to’xtamay ingliz tilini o’rganib kelishiga qoyil qolaman. Oiladagi ayol-onasi Junko esa juda ham o’zbek ayollariga o’xshash. Uni faqat farzandlari va oilasi, ya’ni qaynonasi, xo’jayini va bolalari haqida qayg’urishlari, har bir ishni 82 kirib, qartayib qolgan qaynonasining ruxsati bilan qilishi, erining aytgan gapidan chekkaga chiqib keta olmasligi, oddiy narsalar ustida ham boshqaning ko’nglini og’ritib qo’ymaymanmi deb o’ylanib, iymanib, oldidan o’tolmay o’tirishlari bevosita o’zimni mushtipar onamni eslatib yuboradi. Shunda, ha mana bu haqiqiy sharq ayoli, degim keladi. Yana Okaasan(ona degani) Junko o;zari tan olib qoyadilar: men shuncha yildan beri faqat oila ishlari bilan bo’lib, oddiy narsalar uchun ham o’zim qaror qila olmaydigan bo’lib qolganman, buni ham o’rganish kerak ekan ba’zida deb. Miyig’imda jilmayib, shu xislatingiz bilan ham siz yoqimlisiz degim keladi.

Tark etmang, umidlarim....

“Kishi bir qavmga muhabbat qiladi. Ammo hali ularga qo’shilgani yo’q?” dedi.

“Odam o’zi muhabbat qilganlar bilandir”, dedilar.

hadisdan